“Xotin-qizlarni ijtimoiy qoʻllab-quvvatlash boʻyicha qoʻshimcha chora-tadbirlar toʻgʻrisida”gi Hukumat qarori qabul qilindi.
Qaror bilan Xotin-qizlar muammolarini “Ayollar daftari”ni yuritish orqali tizimli ravishda hal etish va ularni ijtimoiy qoʻllab-quvvatlash boʻyicha vaqtinchalik tartib tasdiqlandi.
Unga koʻra, har bir sektor kesimida mahallabay “Ayollar daftari”ga 30 yoshdan oshgan quyidagi toifadagi xotin-qizlar kiritiladi:
➖ ijtimoiy himoyaga muhtoj ishsiz xotin qizlar;
➖ boquvchisini yoʻqotgan ehtiyojmand xotin-qizlar;
➖ ijtimoiy yordamga muhtoj I va II guruh nogironligi boʻlgan xotin-qizlar;
➖ uy-joyini taʼmirlashga muhtoj I guruh nogironligi boʻlgan xotin-qizlar;
➖ noturar joylarda istiqomat qilayotgan, oʻzining yoki birgalikda yashovchi oila aʼzolarining nomida turar joyi mavjud boʻlmagan xotin-qizlar;
➖ qaramogʻida bir yoki undan ortiq I va II guruh nogironligi boʻlgan bolalari mavjud yolgʻiz ayollar;
➖ tibbiy himoyaga muhtoj ehtiyojmand xotin-qizlar (oʻzi va birgalikda yashovchi oila aʼzolari ogʻir ijtimoiy vaziyatda boʻlgan, surunkali yoki ogʻir nogironlikka olib keluvchi kasallikka chalingan, nogironlik guruhi belgilanmagan, yetarli damromad manbaiga ega boʻlmaganlar);
➖ huquqiy yordam olishga muhtoj xotin-qizlar;
➖ psixologik maslahatga muhtoj xotin-qizlar (tazyiq va zoʻravonlikdan jabrlangan, ijtimoiy muammolari mavjud xotin-qizlar).
“Ayollar daftari” quyidagi tartibda yuritiladi:
Xotin-qizlarning muammolari, ehtiyojlari va qiziqishlari har yarim yil birinchi oyining dastlabki 15 kunida uyma-uy yurib oʻrganiladi.
Xotin-qizlarning muammolari anketa-soʻrovnoma orqali aniqlanib, aniqlangan muammolar 3 kundan oshmagan muddatda xotin-qizlarning shaxsiy individual anketalariga kiritiladi.
Shunga koʻra, 1 kun muddatda individual anketalar koʻrib chiqiladi.
Shundan keyin 3 kundan oshmagan muddatda anketa maʼlumotlari idora va tashkilotlarning maʼlumotlari bilan solishtiriladi hamda ayollarning ijtimoiy himoyaga muhtojlik darajasi (toifasi) aniqlanadi.
“Ayollar daftari”ga kiritiladigan xotin-qizlarning roʻyxatlari hamda ularning muammolarini bartaraf etishga qaratilgan “Yoʻl xaritasi” loyihasi 7 kundan oshmagan muddatda Xalq deputatlari tuman (shahar) kengashiga kiritiladi.
Tasdiqlangan roʻyxatlar 3 kundan oshmagan muddatda Mahalla yagona axborot tizimi dasturiga kiritilib, shu asosda vaqtinchalik tartibda belgilangan xizmatlar koʻrsatiladi.
