Oʻrindosh xodimni toʻliq stavkaga ishga olish mumkinmi?

Oʻrindosh xodimni toʻliq stavkaga ishga olish mumkinmi?

Mart 25, 2024 kuni chop etildi, muallif:

Ish beruvchilar uchun koʻpincha oʻrindoshlik asosida ishlovchi xodimlarni toʻliq stavkaga rasmiylashtirish masalasi dolzarb boʻlib turadi. Ammo amaldagi qonunchilik bu borada aniq cheklovlarni belgilab qoʻygan. Keling, oʻrindoshlik asosida ishlashda ish vaqti va stavka bilan bogʻliq muhim jihatlarni koʻrib chiqaylik.

  1. Oʻrindoshlik asosida ishlaydigan xodimlarning ish vaqti me’yori

Oʻzbekiston Respublikasi Vazirlar Mahkamasining 2012-yil 18-oktabrdagi 297-sonli qaroriga 1-ilovaning 7-bandiga koʻra, oʻrindoshlik asosida ishlash davomiyligi xodimlarning ushbu toifasi uchun belgilangan ish vaqti normasining yarmidan ortiq boʻlishi mumkin emas (sogʻliqni saqlash tizimi vrach xodimlari bundan mustasno).

Bu shuni anglatadiki, oʻrindoshlik asosida ishlovchi xodim koʻpi bilan 0,5 stavkaga rasmiylashtirilishi mumkin. Yaʼni, toʻliq stavkaga rasmiylashtirish imkoniyati yoʻq.

  1. Oʻrindoshlik asosidagi ish vaqti hisobi

Xodim asosiy ish joyidagi majburiyatlarini bajarishdan ozod boʻlgan kunlarda oʻrindoshlik asosida toʻliq ish kunida ishlashi mumkin. Lekin hisobga olinadigan davr uchun oʻrindoshlik asosidagi ish vaqtining umumiy davomiyligi lavozim uchun belgilangan ish vaqti normasining yarmidan oshmasligi lozim.

Bunda hisobga olinadigan davr bir oydan, kunlik ish (smena) davomiyligi esa 12 soatdan ortiq boʻlmasligi kerak.

  1. Oʻrindoshni toʻliq stavkaga rasmiylashtirish imkoniyati

Agar tashkilotda yangi xodimni toʻliq stavkaga ishga qabul qilish zarurati boʻlsa, oʻrindoshlik asosida ishlovchi nomzod bilan uning asosiy ish joyi boʻyicha maqomini oʻzgartirishni (oʻrindoshlik asosida 0,5 stavkaga) va yangi tashkilotda asosiy xodim sifatida toʻliq stavkaga rasmiylashtirish masalasini koʻrib chiqish mumkin.

Ushbu variant har ikki tomon uchun ham maqbul yechim boʻlishi mumkin. Biroq bunday oʻzgarishlar xodimning roziligi asosida amalga oshirilishi lozim.

Xulosa qilib aytganda, oʻrindoshlik asosida ishlash va toʻliq stavkaga rasmiylashtirish masalasi oʻzining aniq qoidalariga ega. Ish beruvchilar va oʻrindoshlik asosida ishlovchi xodimlar mazkur qoidalarni yaxshi bilishlari va ularga rioya etishlari maqsadga muvofiq. Bu esa, oʻz navbatida, ish munosabatlarining qonuniyligini taʼminlaydi hamda ortiqcha tushunmovchiliklarning oldini oladi.