Xodimni bayram kunidan oldin ishdan bo’shatish mumkinmi?
Xodim o’z xohishiga ko’ra mehnat shartnomasini bekor qilmoqchi bo’lsa, odatda ish beruvchini 14 kalendar kun oldin yozma ravishda xabardor qilishi shart (Mehnat kodeksi 160-m. 1-q.). Lekin ayrim hollarda xodim va ish beruvchi o’zaro kelishuv asosida mehnat shartnomasini 14 kunlik ogohlantirish muddati tugamasdan oldin ham bekor qilishlari mumkin (MK 160-m. 4-q.).
Tasavvur qilaylik, xodim 2024 yil 7 martda aniq sanani ko’rsatmasdan ish beruvchiga ariza berdi. Qonunga ko’ra, mehnat shartnomasi 14 kundan keyin – 21 mart, payshanba kuni bekor qilinishi kerak edi. Biroq 21 mart bayram kuniga, undan keyingi 22-23 mart dam olish kunlariga to’g’ri kelmoqda.
Ushbu vaziyatda ish beruvchi xodim bilan kelishgan holda uni bayram va dam olish kunlaridan oldin – 20 mart, chorshanba kuni ishdan bo’shatishi mumkinmi?
Ha, agar xodim bunga rozi bo’lsa, 20 mart kuni ishdan bo’shashi mumkin. Buning uchun u arizasida aniq 20 mart sanasini ko’rsatishi yoki ish beruvchi bilan og’zaki kelishishi lozim bo’ladi. Tomonlarning o’zaro roziligi bo’lsa, 14 kunlik muddat tugamasdan turib shartnomani bekor qilish qonuniy hisoblanadi (MK 160-m. 4-q.).
Agar xodim roziligi bo’lmasa-chi? Masalan, u arizasida hech qanday aniq sana ko’rsatmagan bo’lsa, ish beruvchi uni 20 martda ishdan bo’shatishga haqli emas. Chunki qonun bo’yicha mehnat shartnomasi 14 kunlik muddat o’tganidan keyin – 21 martdan boshlab bekor qilinishi kerak. Hatto bu kun bayramga to’g’ri kelsa ham farqi yo’q.
Xulosa qilib aytganda, xodimni bayram va dam olish kunlaridan oldin ishdan bo’shatish mumkin, ammo faqat uning o’z roziligi bilan. Aks holda, ish beruvchi qonunda belgilangan 14 kunlik muddatga amal qilishi shart bo’ladi.
